Норвешка ќе одвои над 20 милиони евра за нуклеарно зацврстување на Украина
Норвешка вчера соопшти дека ќе одвои 250 милиони норвешки круни или приближно 21,5 милиони евра за зацврстување на нуклеарната безбедност на Украина поради загриженост за ситуацијата во нуклеарната централа Запорожје по уништувањето на браната Каховка, јавија француските медиуми.
„Нелегалната војна што ја почна Русија претставува закана за нуклеарната безбедност и безбедноста во Украина“, се наведува во соопштението на норвешкото Министерство за надворешни работи.
„Нуклеарна несреќа во Украина би имала последици не само за самата Украина, туку и надвор од нејзините граници“, додаде норвешкото Министерство.
Помошта ќе биде поделена преку уплата од 100 милиони норвешки круни за Меѓународната агенција за атомска енергија (МААЕ) за да им се овозможи на нејзините експерти да одржат присутство на неколку нуклеарни локации во Украина, вклучувајќи ги нуклеарната централа Чернобил и нуклеарната централа Запорожје, и пакет од 150 милиони норвешки круни за зајакнување на безбедноста на самите објекти.
Средствата ќе бидат земени од Програмата Нансен, повеќегодишен план за помош според кој Норвешка обезбедува цивилна и воена помош во износ од 75 милијарди норвешки круни за Украина во период од 2023-2027 година.
