Зеленски денеска во посета на Рим- ќе се сретне со лидерите на италијанската држава и со Папата Франциск

Украинскиот претседател Володимир Зеленски денеска ќе го посети Рим, каде што ќе биде пречекан од претседателот Серџо Матарела, потврдија од италијанската претседателска палата за германската новинска агенција ДПА.

Зеленски ќе се сретне и со италијанската премиерка Џорџа Мелони и со папата Франциск за време на неговата прва посета на Рим откако Кремљ ја започна својата инвазија на Украина во февруари 2022 година.

Откако дојде на власт во есента 2022 година, Мелони силно ја поддржува Украина во нејзините обиди да се спротивстави на руската инвазија, а на почетокот на оваа година таа го посети и Киев.

Повеќе од една година папата Франциск речиси секој ден ги повикува верниците да се молат за Украина и редовно апелира до Киев и Москва да се договорат за прекин на огнот.

Папата сѐ уште не ја прифатил украинската покана да го посети Киев, велејќи дека ќе оди само ако биде поканет и во Русија.

Деталите за посетата на Зеленски на Рим првично беа чувани во тајност од безбедносни причини.

Не е јасно дали украинскиот претседател в недела по средбите во Рим ќе отпатува за Германија.

Подготовките за неговото пристигнување во Берлин траат веќе неколку дена, иако тој не е потврден.

Во недела, во име на украинскиот народ, Зеленски треба да ја прими престижната награда Карло Велики во германскиот град Ахен, но останува нејасно дали тој лично ќе присуствува на церемонијата на доделување.