Прогласена вонредна состојба во Италија поради зголемениот број на мигранти

Владата во Италија прогласи шестмесечна вонредна состојба со цел да се справи со зголемениот број на мигранти кои пристигнуваат на јужните брегови на земјата.

Државната телевизија објави дека се очекува да биде назначен специјален комесар за овие прашања.

Радио Слободна Европа јавува дека владата на премиерката Џорџа Малони одобрила финансирање од пет милиони евра за таа намена.

Владата соопшти дека донесувањето на вонредната состојба била неопходна со цел итно спроведување на вонредни мерки за намалување на приливот на бегалци кои пристигнуваат на островот Лампедуза.

Претходните влади, како и сегашната, главно неуспешно се обидуваа да добијат поддршка и поголема солидарност за прифаќање бегалци од другите земји на Европската Унија.

Во Италија од почетокот на годинава пристигнале над 30 илјади мигранти. Тие биле спасени во Средоземното Море од локалните власти или хуманитарни бродови. Тоа е речиси четири пати повеќе во споредба со претходните две години во истиот периот, кога во просек пристигнувале по околу осум илјади мигранти.

Најголемиот број на мигранти доаѓаат од западниот брег на Либија, а во последно време и од Тунис.