Израел го одреди датумот за инвазијата врз Рафа

Израелскиот премиер Бенјамин Нетанјаху во понеделникот изјави дека е одреден датум за инвазија од Израел на Рафа, последното засолниште во Појасот Газа за раселените палестинци, додека во Каиро, соседен Египет се одржува нова рунда разговори за прекин на огнот.

„Денеска добив детален извештај за разговорите во Каиро, ние постојано работиме да ги постигнеме нашите цели, а пред се да ги ослободиме сите наши заложници и да постигнеме целосна победа над терористичката Хамас“, рече Нетанјаху.

„Оваа победа бара влез во Рафа и елиминирање на терористичките баталјони таму. Toa ќе се случи – датумот е одреден“, рече тој.

Изјавата на Нетанјаху дојде веднаш откако десничарските екстремистички фракции во коалициската влада извршија притисок за продолжување на војната во Појасот Газа.

„Ако премиерот одлучи да ја заврши војната без поширок напад на Рафа за решително да го порази Хамас, тој нема да има мандат да остане премиер“, напиша министерот за национална безбедност Итамар Бен-Гвир во понеделникот на платформата X.

Министерот за финансии Безалел Смотрич од радикалната десничарска партија Религиозен ционизам повика во изјава за итен состанок на израелскиот воен кабинет, „по повод извештајот за крајот на војната“.

И покрај жестокото меѓународно противење, Израел со недели вели дека планира копнена инвазија на градот Рафа во јужниот дел од Појасот Газа, каде што повеќе од еден милион палестинци избегаа борејќи се на друго место во енклавата.