Зеленски: Потребна е политичка волја на Западот за на Украина да ѝ се достават потребните воени средства

Претседателот на Украина, Володомир Зеленски синоќа ги повика партнерите од западот на Украина да најдат политичка волја и да му ги обезбедат на Киев потребните воени залихи или како што рече „светот ќе се соочи со една од посрамните страници во историјата“. Зеленски апелот го испрати во време кога американскиот пакет воена и останата помош беше блокиран поради несогласувања во Конгресот.

Како што војната влегува во третата година, руските сили направија напредок на околу 1.000 километри од линијата на фронтот, иако борбените линии малку се променија во последните месеци. Зеленски во редовното видео обраќање истакна дека светот мора „цврсто да реагира“ за да се осигура дека оваа војна ќе стане „безнадежен“ потфат за Путин, кој сака само „војна и смрт“.

– Тие мора максимално да почувствуваат дека постои сила која ги уништува оние што го уништуваат животот. Ние можеме да се погрижиме за тоа. Секој од нашите партнери знае што е потребно“, рече тој. „Главната работа е политичката волја да се направи ова, да ги обезбедиме залихите што ќе бидат корисни, истакна претседателот на Украина.

„Ако ова не е случај, тоа ќе биде една од најсрамните страници во историјата, доколку Америка и Европа загубат од иранските „Шахед“ (дронови) или руски борбени авиони“. Украина, рече тој, „чека залихи кои се клучни и ние чекаме, особено за американската одлука. Навистина е потребна поддршка“.

Претставничкиот дом на САД е под притисок да го усвои пакетот за национална безбедност вреден 95 милијарди долари, со кој ќе се обезбеди помош за Украина и Израел, како и за Индо-Пацификот. Предлог-законот беше одобрен од Сенатот минатиот месец, но претседателот на Претставничкиот дом Мајк Џонсон се противи на испраќање на нацрт-законот за помош во Претставничкиот дом на гласање.