Се совпаѓаат движењата: Презентирани снимки од надзорните камери за двојното убиство на Вања и Панче

Судењето за двојното убиство на Вања Ѓорчевска и Панче Жежовски продолжи со презентирање на материјални докази.

Во судницата беа презентирани докази собрани во десетина розови кеси, кои содржеа листови со пораки од мобилните телефони на обвинетите Љупчо Палевски, Велибор Манев, Влатко Кешишев, Боре Видевски и Александар Ѓорчевски. Посебно внимание предизвикаа снимките од безбедносните камери, кои го покажуваат движењето на возилата „цитроен“ и „рено кангу“.

Обвинителството тврди дека „цитроенот“ бил користен за грабнување на Вања пред нејзиниот дом, додека „рено кангу“, со кое управувал обвинетиот Љупчо Палевски, се движело пред „цитроенот“. Овие возила, според обвинителството, биле евидентирани од системот „Сејф сити“, но одбраната ги оцени доказите како безвредни.

Меѓу доказите беа и снимки кои, според обвинителството, покажуваат како обвинетиот Влатко Кешишев на бензинска станица кај Транспортниот центар наточил гориво во канистер, со кој подоцна бил запален „цитроенот“ за уништување на доказите.

Семејството на Вања Ѓорчевска самостојно пребарувало снимки од приватни камери на продавници, кафулиња и фризерници, бидејќи не биле достапни снимки од градските камери. Во оваа потрага им помогнал сведокот Гоце Трајковски, кој е недостапен за полицијата поради друго кривично дело. Обвинителството бара лично да го испраша сведокот, кој ги поврзал двете грабнувања преку снимки добиени по необјаснив начин.

Судењето е закажано да продолжи на 27 јануари.