ВМРО-ДПМНЕ: Доколку во Европа се случеше скандал како овој со хируршките сали, истиот ден одговорните функционери ќе беа „искуферени“

Цели дваесет дена владее хаос на Клиниката на хирургија, 20 дена владее тотален колапс во терцијалното здравство во Македонија. Клучната клиника кај што се изведуваат најкомплицираните хируршки операции и кај што се третираат најтешките случаи во Македонија, не функционира поради неодговорноста на власта во заминување, велат од ВМРО-ДПМНЕ.

Додаваат дека министерот за здравство префрла вина, заменичката министерка прославува родендени, а 12 директори молчат и се кријат за овој скандал.

– Неброени операции се одложени, животи на луѓе се загрозени, а десетици луѓе дневно се препраќаат во други здравствени установи или приватни клиники и некој си игра пинг понг со нивните судбини, нагласуваат тие.

Во соопштението се додава дека  20 дена не се врши санација на хируршките сали, ниту пак се наоѓа решение за состојбите, што е врв на негрижата која СДСM и ДУИ ја покажаа кон народот сега на заминување.

 Не би сакале да веруваме дека нивната ваква неодговорност е одговор на волјата на граѓаните изразена на изборите. Скандалот да биде поголем се работи за санација која чини се на се 120 илјади евра и оваа екипа од СДСM и ДУИ во 7 години власт не најде простор да ја реализира. Ако овие 7 години работеа како што треба, немаше да се доведеме во ситуација како држава здравјето на толку голем број граѓани и здравствениот систем во целина да бидат доведени во прашање, потенцираат од партијата.

Од ВМРО-ДПМНЕ истакнуваат дека да се случеше нешто слично во европска држава, досега раководните функционери не само што ќе беа „искуферени“ од нивните фотелји истиот ден, туку следниот ден ќе беше поведена постапка за нивна одговорност пред законите.