Патниот лист чини 30 евра за граѓаните кои сакаат да се вратат во Македонија со пасош без „Северна“

Патниот лист за граѓаните затекнати во странство со пасош без „северна“, а треба да се вратат во земјава ќе изнесува 30 евра, што е дополнителен трошок, иако владата порано најавуваше дека граѓаните нема да бидат изложени на нови трошоци.

Патниот лист граѓаните може да го извадат во некое од дипломатско-конзуларните претставништва на Министерството за надворешни работи.

Македонската амбасада во Берлин издаде инструкции за граѓаните кои треба да аплицираат за нови пасоши, но и за патни листови кои ќе чинат 30 евра и ќе паднат на трошок на македонските државјани.

Патниот лист се вади без термин во било која од амбасадите или било кој конзулат и е со важност од 30 дена, односно служи само за враќање во Македонија.

„Ги информираме сите кои ќе поднесат барање за нова патна исправа дека времето за издавање на нов пасош од денот на поднесување на барањето во просек изнесува 50-75 дена, по што пасошите можат да ги лично да ги подигнат во ДКП каде го поднеле барањето.

Доколку државјаните на Република Македонија кои престојуваат во странска држава и кои до 12 февруари 2024 година се уште немаат извадено нов пасош, а имаат намера да аплицираат за издавање на пасоши во Р. Македонија, истите можат да се вратат во земјата со Патен лист кој се вади без термин, со важност на траење од 30 дена од денот на издавање и служи само за враќање во државата.

Напоменуваме дека при издавањето на патните листови пасошите со старото уставно име „Република Македонија„ да не бидат поништувани. Потребни документи за издавање на патен лист: пасош, пополнето барање за издавање на патен лист, две слики и конзуларна такса 30 евра“, објавија од македонската амбасада во Берлин, Германија.