Во контролата на летање упаднале насилници и ги нападнале вработените

Денеска попладне во кулата на контролата на летање на Меѓународниот аеродром во Скопје упаднала група на насилници кои ги нападнале вработените, а дел од нив и физички.

За овој настан, кој се случи по прес-конференцијата на претседателот на синдикатот на контролорите на летање, се огласи и самиот Тасевски, кој вели дека за истиот се информирани Министерството за внатрешни работи и Министерството за транспорт и врски.

Бидејќи во моментов немам време секој медиум посебно да го известам, го користам мојот профил кој што знам дека голем број на медиуми во моментот го следат за да известам дека пред пред околу 30 минути во објектот на контрола на летање дошле неколку возила од кое излегле неколку лица кои влегле во објектот на контрола на летање и предизвикале караница и нападнале вработени во контролата на летање, мои колеги. Случајот е пријавен во полициска станица Петровец, запознати се и министерот транспорт и врски и министерот за Внатрешни работи.

Возилата влегле без да бидат спречени од страна на обезбедувањето кое е од надворешна фирма на која според наши сознанија и е истечен договорот од пред извесно време а немаме информација дали им е продолжен повторно. Од друга страна не реагирало ни обезбедувањето на М-НАВ кое се наоѓа во самиот објект

Овој акт на насилство не само што претставува закана за секој еден професионалец во контролата на летање туку и за безбедноста во авијацијата кога секој еден може од надвор да влезе во објектот и да нападне вработени кои во тој момент извршуваат работни обврски., напиша Тасевски на својот фејсбук профил.

Засега нема информација дали МВР има осомничени или приведени за овој немил настан.