СДСМ: Членство во ЕУ носи бројни придобивки за македонската економија, ВМРО-ДПМНЕ тоа сака да го блокира

Членството во Европската унија носи со себе многу значајни придобивки за македонската економија, отвора големи можности за развој и напредок. Со приемот во ЕУ на Македонија и се отвора пазар од преку 500 милиони потенцијални потрошувачи, каде што македонските компании ќе може да ги понудат и пласираат своите производи и услуги, велат од СДСМ.

Тие додаваат дека процесот на приклучување кон ЕУ значи хармонизација на законодавството со европските норми и стандарди, што креира подобри услови за бизнис и инвестиции, европеизирање на македонскиот бизнис модел.

– Тоа ги отвора трговските перспективи со потенцијал за раст на БДП, кој, според досегашните искуства, кај државите од ЕУ, во првите пет години по членството растел со стапки од 80 до 90 отсто. Тука е и пристапот до европските фондови, најмалку 10 милијарди евра за земјоделството, енергетиката, малите и средните претпријатија, инфраструктурата, образованието. Пристапувањето кон ЕУ значи и шанса за голем скок на платите и раст животниот стандард на граѓаните, со оглед на фактот што, во првите пет години по зачленувањето во ЕУ, растот на платите во земјите членки на ЕУ изнесувал од над 50 отсто, па се до 100 отсто. Ова се дел од придобивките, кои се отвораат со членството во ЕУ за државата и за граѓаните. ВМРО-ДПМНЕ сака тоа да го блокира, посочуваат тие.

Според нив со противење на уставните измени, а со тоа запирање на европскиот пат и неотворање на преговарачките поглавја, ВМРО-ДПМНЕ работи против интересите на државата и на граѓаните, од кои над 80 отсто се за членство во унијата.

Блокадите на ВМРО- ДПМНЕ мораат да бидат поразени, велат од СДСМ.