Мицкоски: Ќе предложиме законски измени за намалување на ДДВ на електрична енергија на 5% и намалување на ДДВ на основните прехранбени производи

Ние како ВМРО-ДПМНЕ и коалиција го поддржавме замрзнувањето на цените бидејќи тоа беше еден момент многу тежок за граѓаните со огромно високо ниво на стапка на инфлација. А, она кое што го добив како вест е токму она што Вие го кажувате, а тоа е дека се одмрзнуваат претходно замрзнатите цени што значи дека сега пазарот ќе ја утврдува цената односно пазарот е тој кој што ќе ја диктира цената. Стравувам за можни последици во делот на инфлацијата и затоа ние како ВМРО-ДПМНЕ и како пратеничка група во Парламентот ќе предложиме законски измени во два дела“, истакна претседателот на ВМРО-ДПМНЕ, проф. д-р Христијан Мицкоски од општина Конче.

Мицкоски во обраќањето додаде дека првиот дел е повторно враќање на данокот на додадена вредност за електрична енергија на 5% бидејќи Фатмир Битиќи веќе најавува дека ќе се враќа на стапката од 18%.

„Исто така ќе предложиме намалување на стапката на данокот на додадена вредност за основните прехранбени производи“, рече претседателот на ВМРО-ДПМНЕ.

Тој додаде дека вистинска Влада која вистински се грижи за своите граѓани ќе скрати од своите луксузирања од бесрамното трошење и криминалното трошење на народните пари во тендери во четири очи. И на тој начин ќе помогне да се зачува и онака веќе кревкиот стандард на граѓаните.