Осум мртви во пожар во Чешка

Во југоисточниот чешки град Брно, во текот на ноќта се запали конструкција направена од неколку станбени контејнери, при што загинаа најмалку осум лица, соопштија локалните пожарникари. Како што објаснија, пожарот брзо се проширил, поради што не можеле да спасат некој од жителите.

„На местото на настанот немаше никој кој можеше да му помогне“, рече портпаролката на службата за итни случаи.

Пожарникарите се бореле со пламените јазици во текот на ноќта. Структурата од 12 обединети контејнери за домување беше исто така демонтирана за да се најдат нејзините скриени жаришта. Пожарот, кој избувна ноќта околу 2 часот по полноќ, конечно беше изгаснат дури во раните утрински часови.

Чешкиот премиер Петр Фиала изрази сочувство до семејствата на загинатите. „Ова е огромна човечка трагедија која не може никого да остави рамнодушен“, напиша градоначалничката на Брно, Маркета Ванкова.

Загинатите сѐ уште не се идентификувани. Според чешката новинска агенција ЦТК, се вели дека станува збор за бездомници, додека локалните медиуми објавија дека контејнерите на земјиштето недалеку од железничката станица веќе неколку години биле празни, делумно покриени со церади и обраснати со плевел.

Истрагата за причините за пожарот е во тек, а исто така ќе треба да се разјасни дали станува збор за подметнување пожар, соопшти чешката полиција.