Ердоган: Го убивме водачот на Исламската држава

Турските сили го убиле осомничениот водач на терористичката група Исламска држава во Сирија, соопшти турскиот претседател Реџеп Таип Ердоган. „Како дел од операцијата на турската национална разузнавачка организација во Сирија, го неутрализиравме лицето во саботата“, рече тој.

Турскиот претседател Реџеп Таип Ердоган изјави за телевизијата ТРТ Турк дека лидерот на Исламската држава (ИД) е „неутрализиран“ во операцијата на турската разузнавачка агенција МИТ во саботата, јавува Би-би-си. Сепак, медиумите не можеа самостојно да ги потврдат неговите тврдења.

Ердоган објасни дека агенцијата МИТ долго време го следела Ал Кураши и дека и по смртта на последниот водач на ИД, тие ќе ја продолжат борбата против терористичките организации. „Без никаква дискриминација“, додаде тој.

Сириски извори, цитирани од новинската агенција Ројтерс, велат дека операцијата се случила во градот Јандарис, кој се наоѓа во близина на турската граница.

Се вели дека Абу Хусеин ал Кураши ја презел групата минатата есен, откако американските сили го убиле неговиот претходник во операција во октомври минатата година. Смртта на претходниот лидер Абу ал Хасан ал Хашеми ал Кураши беше потврдена од џихадистичката група во ноември минатата година.

Исламска држава некогаш контролирала 88.000 квадратни километри територија која се протегала од североисточна Сирија до северен Ирак. Во 2019 година групата беше протерана од последниот дел на оваа територија, но Обединетите нации во јули предупредија дека ИД останува постојана закана. Безбедносните сили проценуваат дека се уште има меѓу 6.000 и 10.000 борци во Сирија и Ирак. Тие главно се сместени на село и продолжуваат да вршат напади.