Здравствените работници денеска на протест за повисоки плати

Здравствените работници во организација на гранковиот синдикат при ССМ и синдикатот на Клинички центар денеска во 12 часот ќе излезат на протест пред зградата на Министерството за здравство.

Тие пред министерството ќе излезат со цел да изразат незадоволство од, како што велат „игнорантскиот однос“ на министерството и на Фондот за здравство кои не одговараат на нивните барања за зголемување на месечните примања по 2.000 денари за лекарите до 3.000 денари за сестрите и другиот среден кадар, кои со покачувањето на минималната плата се изедначиле со хигиеничарите.

Застој во давањето здравствени услуги и покрај протестите нема да има, велат од синдикатите, но додаваат дека доколку не се исполнат нивните барања ќе се организира генерален штрајк во јавното здравство.