Претседателот Пендаровски нема да присуствува на отварањето на македонскиот клуб во Благоевград

Претседателот Стево Пендаровски не добил покана и затоа нема во недела да оди во Благоевград на отварањето на клубот Никола Вапцаров. Ова шефот на државата го потврди во синоќешното интервју за „Сител“.

Тој вели дека неодамна ги примил ОМО Илинден во својот кабинет и е првиот претседател кој во историјата бил домаќин на македонско здружение од Бугарија, но тоа не било доволно за да добие покана. Пендаровски нагласува дека здружението „Никола Вапцаров“ претставува неформално организирање вон прописите на Бугарија.

– Ако го знете соопштението на оние кои го организираат тоа, тие мене не ме поканија, иако тоа ме чуди, затоа што дел од тие луѓе кои ја отвораат таа спомен куќа или дом, затоа што тоа не е регистрирано според бугарските прописи и е приватна иницијатива, беа кај мене со ОМО Илинден заедно со други организации на Македонци од Бугарија, рече претседателот Пендаровски.

Тој додаде дека за 31 година независност, никој не ги примил како група Македонци од Бугарија.