Мелничарите најавија прекин на производството доколку се замрзне цената на лебот

Цената на белиот и полубелиот леб од денеска ќе се замрзне, а по донесувањето на ваквата одлука треба да изнесува максимум 33 денари. Но, ако тоа се случи, мелничарите најавуваат дека ќе го прекинат производството.

Ваквата мерка Министерството за економија ја предложи по анализите кои покажуваат дека повеќето компании од прехранбената индустрија и покрај субвенционираната струја која ја добиваат, по три месеци не ги намалиле цените на производите. Пекарите го негираат тоа и тврдат дека во целост ги испочитувале условите за субвенционирање на електричната енергија. Тие велат дека цената на лебот е намалена повеќе од вредноста на субвенцијата што ја примаат и воедно предупредуваат дека ако се замрзне цената на лебот тие ќе претрпат огромни штети кои се движат од 3.000 до 15.000 евра дневно и ќе бидат принудени да ги затворат производствените капацитети.

-Во вторник ќе се замрзне цената и нема да биде над 33 денари и за белиот и полубелиот леб. Ова е само прв чекор од производите наведени во одлуката на Владата. Ќе следат и нови одлуки за замрзнување на цените. Цените нема да се зголемат по завршување на мерката, освен ако се зголемат цените на суровините и тогаш може да има нагло покачување на цената, соопшти министерот за економија Крешник Бектеши во саботата.

Според Бектеши, не може да има разлика во цената и ист леб да чини од 28 до 38 денари.

Тој потенцира дека ќе се прават инспекциски контроли и во делот на грамажата.

-Утврдено е дека одредени производители и трговци ги намалуваат цените, но ги намалуваат паралелно и количините на тој производ. Затоа, под 450 грама бел и полубел леб не може да се продава и тоа ќе биде со утврдена цена. Под тоа може да биде, но над тоа не може да биде, рече Бектеши.

Мелничарите вчера одржаа состанок во Стопанската комора и донесоа едногласен заклучок – ако Владата ја донесе мерката за ограничување на цената на лебот, од следниот ден нема да има леб на пазарот.

-Денот кога ќе излезе одлуката за замрзнување на цените во Службеник весник, од наредниот ден нема да се произведува леб и да се носи на пазарот, истакна претседателот на Групацијата за мелничко-пекарската индустрија Горан Малишиќ.

Тој објасни дека изминатите два месеца на пазарот цените се намалиле, но имало варијации, зависно од видот на лебот и грамажата, од 33, 35 до 50 денари.

-Цените почнаа нагло да се намалуваат последниве 30 дена. Постои модел како треба Владата да направи социјална цена на социјален леб, како што е направено во Србија. Јасно и гласно е кажано уште пред две години – за да направите социјална цена на леб, и да го задоволите населението, треба да се фатите за џеб, народски кажано. Во Србија државата субвенционира 30 проценти од цената на брашното на пекарите за да има одредена цена која српската Владата ја покачи пред три дена. Постојат модели, да, тоа е трошок, но ако сакаме да имаме социјална цена со една цена на пазарот мора Владата да субвенционира, не можеме да бидеме ние општествено одговорни компании кои ќе бидат во загуба, рече Малишиќ.

Со мерката за субвенционирана струја која се применува веќе три месеци, се опфатени компании што произведуваат масло за јадење, леб и пекарски производи, брашно, млеко и млечни производи, како и месната и живинарската индустрија.